العيكورة : (بعيداً عن السياسة) *شُكراً أخونا (أبجيقة) أركان حرب*

(بعيداً عن السياسة)

*شُكراً أخونا (أبجيقة) أركان حرب*

بقلم/صبري محمد علي (العيكورة)

نصائح بعث لي بها عسكري متقاعد يقول إنها مهمة لمن يرغب في (العرسة التانية) ولسرية البيانات كما وعدنا من قبل فسنحتفظ بها ونشكر بدورنا (سعادتو أبجيقة) على هذه الأريحية والصراحة
يقول ……
الموضوع يجب ان يسبقة تخطيط وتأني وعلي (أبجيقة العريس) أن يكون على دراية تامة بنفسية (المدام بتاعتو) هل هي من النوع أبو صبغة أم أبو ساطور واللّا بتاعت انبوبة غاز

(تانياً) سعادتو قال برضو (الحنك) والغناء مطلوبان في هذه المرحلة
ياخ أنتي وين القى زييك
يا ست الحسان
يا (مُش عارف إيه)
وفي الجنة زاتا أنا ما داير غيرك
يقول هذه جرعات مهمة جداً لتهيئة المسرح مع ملاحظة (إنو) في هذه المرحلة سيكون رادار (الحاجة) في أعلى درجات الحساسية وعلى أبجيقة أن ينتبه لهذه الحالة و أن يلتزم الإنكار لأي تهمة ولو ضمنية لأنها مرحلة عابرة لن تدوم طويلاً و تتطلب الصبر والصرامة والجِدِّيه في التعامل
والإستجابة برضاً لكافة طلبات البيت

قال ….
خلال هذه الفترة وعند إقتراب موعد (العقد) يجب أن يصاحبها تهيئة أخيرة للمسرح
فمثلاً …..
يجب أن يكون هناك باب خلفي صغير بالصالون لزوم المُخارجة و الإنسحاب (التكتيكي) فيما لو حدث أي هجوم ليلي من الهانم الغاضبة

وعليه أيضاً معرفة موقع (الحيطة) القصيرة وأقصر السُبُل المُؤدية إليها وكيفية قفزها إن إستدعى الأمر

يقول سعادتو أبجيقة …..
حتى إخفاء الأدوات الحادة بالمطبخ تدخل ضمن قائمة الادوات التي تشكل خطراً على الحياة ويجب إخفاؤها

طيب …..
مشيت يا أبجيقة حسب الموعد المضروب بالثانية والدقيقة مع المتعاونين بتاعنك و تم عقد القران الصامت وإستلمت البضاعة بتاعتك ويا شهر العسل جاك (كومر) يومين ، تلاته ، إسبوع
رجعت يا زينة الرُجال
كرعيك ما شايلاتنك

وتاني يوم (ممسّح) ماشي تصبِّح علي وليداك

سعادتو أبجيقة قال دي أخطر لحظة وأكبر عقبة فإن نجوت منها سهُل ما بعدها

قال (أووول) حاجة بعد السلام تقول ليها (أكبر غلطة في حياتك هي عرستك) قال ليك دي من شانها أن تخفف حنق الهانم بنسبة ٤٠٪

طبعاً وإنت ترقش يا عريس مشت جابت ليك (كباية عصير)

سعاتو أبجيقة قال ليك
في الحالة دي طوالي تنادي لواحد من شُفّعك تقول ليه (شيل ليك جُغمة يا حمادة) و راقب الموقف !!!

فإذا الهانم (نطّت) في الكُباية ومسكتها من الولد وقالت حمادة شرب الشاهي هسي وما بقدر يشربها وخليهو عليك الله !
فاعلم انك نجوت من موته (صبغة)
أما إن تركته يشرب فإطمئن يا عزيزي و بالهناء و الشفاء عليك يا عريس

سعادتو برضو قال ….
هذه الفرصة سانحة جداً لتاكيد المواثيق بأنك قدر المسؤلية و(كللللو شئ) ولا مصاريفكم وفي اللحظة دي تطلع ليك
(رُزّمة من النوع أبو مية)
كده وتقول ليها دي مصاريف الأسبوع ده يا (سُكسُكه)
(وأنتا عارف إنها مصاريف شهر كامل) لكن ما تتوقف قالوا المال فداء الرقبة

(فاااا) سعادتو قال
الحكاية دي (بتوفر ليها) مساحة واسعة من الإطمئنان النفسي وفي ذات الوقت ستُرسل رسالة لأسرتها بذات المعنى

سعادتو قال ….
وإنت تقدم لها رزمة المصاريف خلي معاك رُزمة تانية صغيرة برضو من النوع أبو خمسين وقول ليها و(إنتا) تبتسم
*و دي كمان حقت الفكي يا حُمبُكة*
يعني (معناتا) ….
لو ماشة ترخصيني فهذه أتعاب الفكي!
يقول سعادتو أركان حرب بهذه الخطوة الذكية ستتراجع عن أي سوء قد زينه لها الشيطان تجاهك وبذلك في (قعدة واحدة) تكون قد تجاوزت كتيبة الصبغة وكتيبة السكاكين و مُتحرك الفكي أبّكر

حقيقة بإسمكم جميعاً أشكر سعادة (أخونا) أبجيقة أركان حرب على هذه النصائح القيِّمة و نضعها في بريد كل خوّافٍ رجّافٍ ذو خُفٍ كبير باحث عن (التدبيلة) الآمنه
دمتم بخير أعزائي (أبجيقات)

الأحد ٢٥/مايو/٢٠٢٥م