العيكورة يكتب: *وكلام عن بنك السودان نوجهه (دايركت) للفريق البرهان*

والكلام رسالة من صديق يعمل ضمن الوظائف العليا بالقطاع المصرفي مشفوعةً بالقائمة التي أصدرها بنك السودان مُؤخراً للبنوك التجارية بتجميد حسابات بعض العملاء (الكرام) …..

طيب نشوف الزول ده قال شنو في رسالته ….

قال

لمّا أقول ليك بنك السودان كُله (جنجويد) متغلغلين في أجهزته صدقني !

الكشف المُرسل لكم يا صديقي نمرة (٢٥) ده ….!

طوالي ومن فوق للنظارة جُرّ الشاشة يا ولد القى ليك الإسم

*مصطفى إبراهيم عبد النبي*

أيوه لقيتو يا فرده مالو الزول ده؟

قال ليك ….

ده المسؤول الأول عن الإمبراطورية المالية للدعم السريع من شركات وبنوك

و بيني وبينك يا (عب باسط) يُعتبر هو الرئيس الفعلي لمجلس إدارة بنك الخليج !!

وبعدين يا صاحبي نمرة (٢٦) في الكشف

طيب أصبر عليّ أكمل القراية

أيوه أيوه ده إسمو ….

*قريب الله محمدين الدود مهدي*

أهاا ما لو شقي الحال ده كمان؟

قال ليك ده حكايتو أسكت ساي غايتو .

ده يا سيدي ….

المدير المالي للدعم السريع ومافي قرش يطلع من بنك من غير توقيعه !

ثم أردف صديقي (البانكر)

وسأنقلها نصّاً بلا تصرف مني

*يادوووب بعد قريب سنتين يطلِّعُوا حظر لحساباتهما وكأنهم كانوا منتظرين شنو ما عارف؟*

وبعدين تعرف يا أستاذ

صدق أو لا تصدق أن الدعم السريع كان يمتلك ٩٠٪من بنك الخليج و ٧٠٪من بنك الثروة الحيوانية

ولعلمك ….

مصطفى عبد النبي ده هو شقيق (القحاطي) وزير الثروة الحيوانية حافظ عبد النبي

الذي ظهر ضمن إجتماعات (قحط) الأخيرة في كينيا !!

وأظن في (تلاطيش) خبر كده (إنو) البرهان الأيامات دي كايس ليهو لوزير ثروة حيوانية جديد !

عزيزي القارئ …..

أعتقد (جازمن) أنني لم أضف لك شيئاً جديداً في ما ذكرت فكلنا لديه هذه المعلومات (المؤسفة) بطريقة أو بأخرى

إذاً و إذا كان الأمر كذلك

*البرهان عاوز بالمحافظ ده شنو؟*

يا سيادتو ….

الدولة تيبّست مفاصلها ببقايا قحط و(الحاجة اليابسة) يا سعادتك ببلوها بالموية

 (فااا) …..

وطالما الكلام كده و البنك يتبع لمجلس السيادة

أو ياخ قووول (تب) يتبع لعمنا عثمان حسين بمجلس الوزراء

فياخي مااااااا ……

تبلّهُم بلّاهُم بلا ياخُدهم ياخ

*أستفغر الله العظيم*

الأحد ٢٢/ديسمبر ٢٠٢٤م

ّ