عزيزي القحاطي من وين أجيب ليك الفهم ….؟

*جلسة شاي خفيف*

عزيزي القحاطي من وين أجيب ليك الفهم ….؟

بقلم/صبري محمد علي

عزيزي القارئ أولاً عاوزك تضع هذه الحقيقة المهمة نصب عينيك قبل أن تقراء هذا المقال وهي …

أكتر حاجتين أتعامل معهما بقزقزة وإستمتاع هما القحاطة والكوارع

تمام كده؟

 إتفقنا؟ طيب

اليوم حمل لي مما يحمل البحر تسجيلاً صوتياً لمن سمى نفسه بابي المصباح الحمد

نعم أتفق معاك أن الإسم لربما بعضاً من (عدة الشُغُل) وليس بالضرورة أن يكون حقيقياً

يقول مُخاطباً (قروب)

(الخلاص بعد هيمنة الرصاص)

هكذا قالها ….

هذا الرجل مُبدع مُبدع في السرد الروائي بطريقة مُدهشة

بإختصار كده يا (عب باسط)

أنا غايتو (قررربت أصدقو)

قال أنه ترك ما بيده من برنامجه اليومي للسواقة بالخلاء

 لان هناك أمراً خطيراً ويجب التوقف عنده بل وطالب أعضاء القروب بضرورة التداخل لسماع أرائهم

وطبعا ياجماعة ….

 حكاية (الصفقة الصفقة) يا شباب

دي حاجة ….

 مُهمة جداً في عملية إستلام الكاش

و(البصلي ع النبي يديني لايك)

كما هو معروف للباحثين عن الشهرة (الإسفيرية) أو العائد المادي

هذا (الزول) …..

 ربنا حباه بصوت فخيم وحنجرة إذاعية جاذبه للسامعين

 يرص الكلام رص

 من لا يخشى الفقر

قال إن هُناك اجتماعاً خطيراً للحركة (الإسلاموية) و بعدها مباشرة لديه ثلاثية (سبحان الله)

 تتنزل تلقائياً بعد كلمة (إسلاموية)

تجار الدين

تجار الحروب

تجار المخدرات

المُهِم يا (صاحبي) …..

 يقول أن هنالك إجتماع قد تم بين (٥٠) من أعضاء الحركة الاسلامية عبر تقانة (الزوم) بين تركيا ومصر و بورتسودان !

وإنووو ……

الكيزان ديل قدموا (٣) أوراق عمل وفصّلها بطريقته حسب غرضه

(غايتو أنا دعوت له بالشفاء)

و سمّاها (تسريبات) وصلته من جهة إعلامية مؤثرة (إسلاموية) سودانية من داخل تركيا !

أها وبعدين

 يا أبو المصباح؟

قال إن خلاصة الإجتماع هي

أنهم قرروا ….

 لإستلام السلطة بالقوة !

طبعاً…

هذه الخلاصة ذكرها بعد قصة (طويييلة) ونحنحة و شوية مُحسنات بديعية و …. و …..

وإستخدام لكُل أنواع

 (العِدة) طلس ، صيني ، الومنيوم …الخ

على كل حال يا (رفيق) ….

لو أن الكيزان أو الاسلامويين عاوزين يكشروا عن أنيابهم كما وصفتهم

لما كان لثورة ديسمبر أن ترى النور (أساساً) يوم أن كانت بيدهم السلطة والدفاع الشعبي وسائحون وساهرون و …و …..

وإنما رحبوا بالتغيير و تحملوا ما أصابهم من أذى

 بل وأدخلوا لقاموس السياسة السودانية جُملة (المعارضة المُساندة)

الجملة التي ….

 لم تفهمها قحط حتى هروبها

وما زال موقفهم الذي ما فتئوا يكررونه أنهم سيدعمون الجيش وأن لا بقاء للوطن بلا قواته المسلحة وأنهم حزب (صندوق)

نعم فقط

 صندوق الإنتخابات

(شفتا الرجالة دي كيف) !

ياخ …..

(خليك من تسريباتك) المزعومة

 هذا هو كلامهم المبذول عبر الفضاء (الإسفيري) كلام واضح

 لا يحتمل وجهين

 ولا يقبل القسمة على إثنين

 وها هُم تجدهم

 على كل (جبل رُماة) داعمين للجيش لم يسألوا قيادة الجيش سُلطة

 ولم يرتدوا لها (كاكي) تزلفاً

 ولم يحجوا لبورتسودان ولا كرري كما فعل آخرون .

بل أصابعهم على الزناد يحتسبون الأجر من الله في سبيل أن يبقى الوطن حراً عزيزاً أبياً عصياً على العُملاء وقد كان لهم ما أرادوا

مشكلة القحاطة وين يا جماعة …؟

مشكلتهم أنهم يجهلون

 (آداب الكضب) ….!

نعم …..

الشُغلانة ما فوضى ساكت

كل (رُزمة) دولارات تقوم تنبرش أمامها

لا لا يا (أخا القحط)

أقعد في الواطة دي جيب ليك كباية شاهي كاااربة أدرس المطلوب منك شنو بالضبط

وبتخاطب منو

وعاوز تصل لشنو

بعد داك …

شوف عدة الشُغُل حسب

 (طلبية الكفيل)

تسجيل صوتي …

لايف …

مقال ….

خبر عابر للقارات ….

لفح شبشب على خفيف ….

خبر صلاحية يوم ….

خبر (جس نبض) ….

وهكذا

لكن ياخ معقول (حتة واحده كده)

تقول لي تسريبات !

ياخ الكيزان ديل دوخوا أمريكا ومخابرات العالم

معقول يضروا عيشهم في الهواء؟

لكل من هب و دب .

ياخي ديل أنشأوا ثاني أقوى جهاز مخابرات إفريقياً

ياخي ديل حيروا العالم (٣٠) سنة حصار

والغداء قندهار

والعشاء عوضية سمك

ياخ ديل والله حيروا إقتصاديي العالم

وأذهلوا صُناع السلاح

تقول لي يسربوا محضر إجتماع !

ياخ ديل أرقوا منام رؤساء دول داخل قصورهم عندما تطاولوا على السودان

تقول ليّ تسريب محضر !

غايتو ….

تحرير الاذاعة ده الدخلها فيكم ما بتمرق بالساهل !

وحتى نلتقي مع قحاطي آخر

(راسو مدقوس)

في مقطع آخر نستودعكم الله

الإثنين ٢٢/رمضان ١٤٤٥ه‍

١/أبريل ٢٠٢٤م