العيكورة : *إستبدال العملة (السنين يا ريتا تجري وكُل يوم يا ريتو باكر)*

*إستبدال العملة*

*(السنين يا ريتا تجري*

*وكُل يوم يا ريتو باكر)*

بقلم/صبري محمد علي

اليوم وقد أُعلن عن تمديد فترة إستبدال العُملة لستة أيام قادمة تنتهي الأثنين السادس من يناير القادم والذي سيبدأ غداً بإذن الله

تكون قد إنتهت إحدى معارك الكرامة بالإنتصار لإقتصاد هذا الوطن العزيز

وستبدأ أو يُفترض أن تبدأ ومنذ اليوم التالي وهو الثلاثاء السابع من يناير الإنتقال الى نظام السداد الإلكتروني سواءاً عبر

البطاقات البنكية

 أو التطبيقات

 أو التحويل المباشر

بمعنى آخر ….

قروش نشيلا نحوم بيها دي تاني مافي داعي ليها

عراقي تحت الجلابية جيبو (غريييق) عشان نحفظ قروشنا من النشالين

ده كلام أصبح من الماضي

الكمساري يطقطق ليك أسمع ياخينا

مافي كلام زي ده السداد من المحطات و أو بجهاز الدفع الآلي المحمول وهو في حجم الموبايل و زيادة شويتين كده

إنتي يا خالتنا ….

قروش تاني تدسيها بين الكبابي داخل الفضية الكلام ده تاني ما ليهو لزوم

ناس الأعراس والأفراح المساهمة إلإلكترونية أين المشكلة

الحلاق

بتاع الطعمية

عوضية سمك

آدم شيّة

بتاع الخدار

الجزار

شراء بالتطبيقات فما المانع؟

تجار الإجمالي

الأراضي

أباطرة الكرين

تحويل (بنكي) كاش تاني ما بتلقاهو

كل العالم المتحضر شغال كده فما الذي ينقصنا؟

الأجهزة أم البرامج أم أولادنا عفاريت ال (آي . تي) أم خبراء البنوك ؟

كله مُتوفر

طيب…..

حا تقول لي و(الفايده) شنو من كلامك ده يا أستاذ

أقول ليك الفايده يا إبني هي

ضبط الكتلة النقدية و ضبط حركتها اليومية وعلى أساسها يُمكن ل (أبونا) صانع القرار إتخاذ القرار المالي أو الخدمي السليم .

*يعني أفرض مثلاً أنا رئيس البلد دي*

*فرضاً يعني*

بعد أتغدى و أشرب شاهي المغرب

أرفع السماعة على وزير المالية بتاعنا !

يا معالي الوزير…..

(البتاعة العامة) فيها كم اليوم ؟

*وطبعاً و بما إنو كل شئ محسوب ومرصود عبر برامج مالية حاسوبية فما علي الوزير إلا أن يفتح (اللاب توب)* ويقول ليّ

والله …..

يا فخامة الرئيس فيها (الشئ الفلاني) من الدولار و عندنا كذا مليار من الجنية السوداني وهكذا من اليَرو وكذا من الإسترليني

أقوم يا سيدي …..

أرفع السماعة على وزير الصحة مثلاً

يا دكتور …..

إنت الالمان عاوزين منك كم عشان باخرة الادوية تتحرك

وإنتا يا بتاع الكهرباء

قطع الغيار الجايانا من الصين قلت لي تكلفتها كم؟

ويا الخارجية قُلتو ليّ كم نفر عندكم مسافرين للمؤتمر الفلاني

وهكذا ….

أقوم بكره و ب (قلب قوي) أشتغل ليك تصاديق وتواقيع والإستلام فوراً

وهذا الإجراء يتكرر كل شهر وكل يوم

عرفتوا فائدة ضبط الكتلة النقدية يعني شنو؟

طيب بالله (إتخيّل معاي)

لو أن هذه المبالغ كانت مخزّنة عند ….

حاج أبكر بتاع الشطة

 و (مُش عارف)

العوض تاجر البصل

و الجزار الفلاني لامي ليهو شوالين تلاته

ونقابة اللواري السفرية مخزنه قروشا عند رئيسها عمّك (كاروشة)

و غيرو و غيرو!

من أنواع الإحتفاظ بالعُملة خارج النظام المصرفي

تفتكروا …

البلد دي بتمشي لي قِدّام !!

عزيزي المواطن

إستبدل قروشك و ريح بالك وصدقني القادم أحلى

أما السادة النشالين والحرامية فأحسن يشُوفُو ليهم شغلانه تانية

عِتالة

نِجارة

حِدادة

يدبرو راسهم

لكن صدقوني ….

بكرة سوداننا أغني وأجمل وأنضر

*والسنين يا ريتا تجري*

*وكُلُ يوم يا ريتو باكر*

وستذكرون ما أقول

*وطن عظيم ياخ*

الثلاثاء ٣١/ديسمبر ٢٠٢٤م