صبري محمد علي: *الأمين العام للأمم المتحدة ياخ أحترم عقولنا ياخ*
تصور يا مؤمن أن
الأمين العام للأمم المتحدة أكد في إفتتاح دورة الجمعية العامة رقم (٧٩) وبعد سنة وخمسة شهور من إندلاع التمرد بالسودان
أكد أن …..
*بعض القوى الخارجية لا تزال تواصل التدخل في الأزمة السودانية*
وقال …….
إن النزاع ولّد عُنفاً مُروعاً مُشيراً الى حالات الإغتصاب والإعتداءآت الجنسية (الواسعة النطاق)
و وصف (العارف بالله) أن المجاعة بدأت في الإنتشار (يعني لسه شوية)
وأشار (المستر) الى بوادر كارثة إنسانية بدأت تلوح في الأفق أو كما قال …..
*فال الله ولا فالك ياخ*
وقال (لافض فوه)
ورغم ذلك تواصل قوى خارجية التدخل في غياب أي نهج لإحلال السلام في السودان
*(إنتهت الموعظة الحسنة الأممية)*
فااااا ……
السيد الأمين العام
(كتر خيرو) بعد قرابة العام والنصف نطق بما تحدث به صبي الدرداقة بالسوق العربي منذ الشهر الأول لإندلاع التمرد .
و (سعادتو) …..
بحديثه هذا يُبرهن
*(إنو ما ناقش أبو النوم)* عن مهام المنظمة الأممية التي يتولى أمانتها العامة و يكشف عجزها التام لوضع خطة للخروج برؤية عادلة للسلام في السودان الذي يتحدث عنه
نقدر جداً (الزردية) التي أدخلكم فيها الشعب السوداني وهي
إما أن تقفوا مع الحق والحق مع الشعب السوداني
وإما أن تقفوا مع الباطل وهذا يعني أن ميثاق الأمم المتحدة فقرة فقرة سيكون تحت (الأحذية)
*نفسي أفهم*
الزول ده بالع شنو حتى يعجز عن تسمية تلك
*الدول الخارجية* مجرد تسمية
التي قال إنها تواصل التدخل في الأزمة السودانية !
ياخ تعال أديك (درس عصر) مجاني
أحسب معاي …..
القشارات واحدة
وأمريكا (إتنين)
وتشاد (تلاته)
وجنس برودك ده (أربعة)
وبعض أولاد خالتنا من رؤساء الدول الأفريقية من النوع
(أبو مية) الف دولار
قول (خمسة) !
هسي بالله
الحكاية دي لو ما (….) منك ساي عايزا ليها نحنجة وحكّة دِقن
ما واضحه زي عين الشمس
أنت تعلم
ونحن نعلم
أنك تترأس أكبر كذبة عرفها التاريخ منذ العام ١٩٤٥م
الأمم المتحدة فهناك يذبح كل شئ إلا *الكذب*
فله صروح و أسس وتقاليد و(كلو محمي بالقانون اللّْعوج)
السيد الأمين العام
رجاءً ياخ
(ما تقوم علينا المصران) ساكت
شوف ضيوفك
وكضبوا كضبكم
وأبدوا ما شئتم من أسف
لكن كلامنا (نحنا) …..
فستسمعونه بعد غدٍ
من السيد البرهان
قمة هرم الدولة السودانية
شاء من شاء
وأبى من أبى
والماعجبو
(يعمل شنو ياجماعة) ؟
أيواااا
يشرب البحر
يا السيد (اللمين العام)
*أمانةً في ذمتك …*
(التفاهو) الطيران صباح اليوم في الضعين كان ويكة؟
ما ياهو سلاح دولة (القشارات)
وبرضو تُصر تقول لينا
*بعض القُوى الخارجية*
*يخرب بيوتكم ياخ*
أمسية الثلاثاء ٢٤/سبتمبر ٢٠٢٤م
