صبري محمد علي: *ابراهيم جابر (جغموني في حُبك)*
بالأمس أرسل لي إبن عمي المهندس فايز السماني خبر وسؤال
أما الخبر …..
فكان عن إستقبال عضو مجلس السيادة الفريق أول ركن مهندس و مساعد القائد العام ابراهيم جابر لوفد ولاية نهر النيل برئاسة السيد الوالي العائد من تركيا بعد زيارة كانت تتعلق بنقل التقانة غير التقليدية في مجال الزراعة (وكلام من هذا الذي منو)
وأظن الوفد إتفسّح كوييس وعدد بعض المُدُن التركية التي زارها بحسب ما ورد في الخبر
وأن السيّد عضو مجلس السيادة أشاد بالزيارة ونتائجها (وحاجة بالشكل ده)
الخبر جاء بُعيد مُحاولة إستهداف السيّد القائد في مدينة (جبيت) شرقي السودان و تحوُل بورصة الإعلام نحو الخبر
إبن عمي
*(شاف الحكاية دي ما ياها)*
كيييف ….
البلد كلها فايرة تكتب وتندد بهذه العملية الجبانة و إبراهيم جابر يستقبل ليهو وفد ولائي آتٍ من الخارج !!
وسؤال إبن عمي كان هو ….
*الناس في شنو والزول ده في شنو*؟
طالباً مني التعليق …..
حقيقة يا باشمهندس
لربما لم أكُن مُتابع للفاصل الزمني بين حادثة (جبيت) وبين إستقبال الفريق جابر للوفد
لكن في النهاية …..
كل زول وليهو شُغلُو
هسي في حلتكم (مُش) الحاجة العاوزه ليها عضلات بقولو نادوا ليها فلان
والعاوزة ليها حِكمة وكلام (حِلّلو) برضو ليها ناسها
والعاوزة دهاء ومكر و (سعلبة) برضو ليها مُتخصين
فاااا …..
(إبن العم) الفريق إبراهيم جابر أظنو شغال ليهو شغلانة بتاعت (كِسّير مقاديف) للتمرد غير مرئية لذا تلاحظ أنه هو الأقل تصريحاً بالإدانة و بُعداً عن التصريحات النارية و لم يسلم من النقد بسبب ذلك الإقلال في التصريحات او الخروج خارج بورتسودان
ولكن قناعتي أن للجيش أكاديميات عسكرية تخطط وترسم ومستشاريات و إستراتيجيات ولا يُمكن للسيد جابر أن يدُور خارج فلكها
تاني حاجة …..
الزول ده ماسك ليهو ملف (خطير جداً) وهو مُتابعة أنشطة مُنظمات الأمم المتحدة والمنظمات الأجنببة الأخرى العاملة بالسودان
و ده شُغُل عاوز ليهو زول صاحي و صاحب قرار و زول (بهرش) الخواحات
*أنا غايتو ……*
كُل ما أقرأ أو أشاهد السيد الفريق (إبراهومة) في الإعلام يتحدث
بتذكر الزول
*(البحرِّسوه طبّاخ العِرس)*
فمن يُكلّف بهذه المُهمة غالباً
ما (يكون ناقش أي حاجة) و ذو مُهمته محدودة
و قصيرة جداً
*تنتهي بخروج آخر صينية !*
فاااا …..
الزول ده بالضبط أنا شايفو كده
*لكن لسه ما قعد مع أبو العريس*
عشان يديهو التقرير
التحية لأسود السودان قادة الجيش و تيجان رؤوسنا
الفريق أول رُكُن (غتاته)
العم (بوبو)
الفريق أول ركن (نار الضلع)
الكباشي
الفريق أول رُكُن (صراحة)
ياسر العطاء
الفريق أول رُكُن (الهندسة الصامته)
إبراهيم جابر
دُمتُم بخير و جمعة مباركة عليكم
بس أظن …..
*الحكاية عاوزه جكّة شوية*
الجمعة ٢/أغسطس ٢٠٢٤م
