صبري محمد علي : السفير البريطاني و (رَقَعَة) القحاطة ! وأشياء أخرى

ورد في الأخبار بالأمس ان (طنط) بريطانيا تخير سفيرها بالسودان المستر (مُش عارف كده) جالنيز بين أن يستقيل هو أو أن تقيله وزارة الخارجية البريطانية

 بسبب تقديمه لدعم مالي كبير لمؤتمر (القحاطة) و لتضليلها بتقارير تفتقر

 (قال ليك) …

 للدقة بخصوص ما يحدث في السودان !

اولاً دعني ….

 أعود بكم عزيزي القارئ الى شرح مُفردة (رَقَعَة) بفتح كافة الحروف وهي مُصطلح حصري سوداني

 يعني ….

 (الغمتة) التي يّرجى منها منفعة

طيب ….

تصريح الخارجية البريطانية يحمل نوعاً من (الإستكياش) لعقليتنا نحن كسودانيين ولعقلية البريطانيين على حدٍ سواء

قول ليّ كيفن؟

أولا (كونو) الخارجية البريطانية لا تعلم عن نشاط سفيرها في السودان فهذا كلام لا يدخل الرأس !

فلا يوجد سفير في الدنيا يعمل خارج موجهات وسياسة بلده !

و قبل ما تقول لي يعني بريطانيا عارفه موضوع (الرقعة) دي وكده؟

أقول ليك نعم و (تمامن) !

طيب والجدّ شنو ؟

هل هو تغيير مواقف مثلاً!

أسمعني يا صاحبي …

مما لا شك فيه أن دافع الضرائب البريطاني مُتابع لكل حاجة

وعااارف حكومتو خاتا راسها مع منو في السودان وحريص جداً أن يعرف أين تذهب أمواله

والبريطاني بطبعو زول (جِلّده) بعدي سنتو ببنطلون جينز واحد !

(فاااا) …..

مُجرد ما حصلت موقعة

 (ذات الشلاليت) بين القحاطة يوم أمس الأول وعرف الشعب البريطاني أن (قروشو) بتمشي لهؤلاء الصعاليك بدأت تحدث بداخله نوعاً من التعبئة والإستهجان المُجتمعي ضد سياسة حكومتهم .

والبريطانيون هُم أهل (الردحي) ودق الطار حول العالم و بلا مُنازع

 بس باللغة الإنجليزية

فبالطبع في هذا الموقف

 المُحرج كان لابد من (كبش فداء) !!

فقال ليك ياولد ..

خلينا (نزلقا) في السفير المسكين ده !

وطلعو بيانهم المُضحك !

من ناحية أخرى أعتقد أن أمام السيد النائب العام (بتاعنا) فرصة سانحة بعد الإعتراف البريطاني الصريح بدعم هؤلاء الصعاليك أن تصحو النيابات وتشوف (شغلها) ! ضد هؤلاء العُملاء

 من(البطينيين) !

و(البطيني) …..

أيضاً هي صفة تُطلق على الإنسان الأكُول أو الدنئ كما في بعض المعاجم

(مُش) في حِلّتكم …

 في نوع كده من الناس لما يحكي عن الأكل (بتلقاهو) يتكلم ويتمطق !

 وفي نوع (تاني) كده (عطرابة) الشحمة في النار بتجيب ليك آخرو ؟

بس ديل ياهُم القحاطة …!

*البوفيه المفتوح …..*

 هُناك (٥٠) ثانية لمقطع (فيديو) مبذول عبر (الميديا) للقحاطة وهم يقبضون ثمن العمالة (سفسة)

آآي و الله أكل بس ….!

(شُفتو الرخسة دي كيف) !

شوية محاشي

و(مُش عارف)

 على شوية ورق عنب

 على حبتين فراخ

 على شوية كُفتة

 وشرائح بطيخ و قطع كيك …!!!

(يخسيييي) ..!!!!

بالله إنتو (رخيسين) كده ؟

(كافيار) ساي ما فيها ؟

لحمة (الواغيو) البقر الياباني الأفضل حول العالم الغاالية ديك سعر كيلو منها يتراوح بين (٤٠٠) الى (٦٠٠) دولار

ما سمعتوا بيها !

السمك الغااالي المش عارف بالشئ الفلاني ما قريتوا عنه !

*(بالله إشتروكم بالمُجمد والمُعلّب)؟*

*اللهم لا تؤاخذنا*

*بما فعل السُفهاءُ مِنّا*

السبت ١/يونيو ٢٠٢٤م