العيكورة يكتب: (سوداتل) وصاج الطعمية أيهما افضل؟
(سوداتل) وصاج الطعمية أيهما افضل؟
بقلم/صبري محمد علي (العيكورة)
الحقيقة تابعت بيان مجموعة سوداتل للإتصالات المحدودة الذي عقد بتاريخ (٢٧) من شهر سبتمبر الماضي بصالة الخبير بمدينة بورتسودان
وكنت اود التعليق عليه لحظتها ولكن سرقتنا سرعة الاحداث العسكرية عن ذلك .
ومنطلق حرصي على الكتابة كان هو ضآلة أرباح المساهمين مقارنة بحوافز اعضاء مجلس الادارة للجمعية العمومية
حتى هممتُ …
ياخ هممت شنو؟
انا نصحت اقربائي عديل من المساهمين ان يطلعوا من هذه الحكاية الميتة
ويعملو ليهم (صاج طعمية) او اي شغلانة تانية
طيب ….
اصبر ليّ ماشي عليك في الكلام
وحتى لا (ادوشك) عزيزي القارئ في الكلام فسأستغني عن النسب والارقام التى حواها البيان و سنتكلم (بالبلدي كده)
(فاااا)…..
الجماعة ديل …
اجتمعوا كمجلس ادارة
(اللي هم) عشرة اشخاص
رئيس مجلس الادارة ونائبه والرئيس التنفيذي وعضوية سبعة آخرين
ديل شنو يا جماعة ؟
ديل المجلس ادارة الجمعية العمومية
(الجمعية حاضرة الوكت داك واللا لا علمي علمك واحد)
الارباح مثار الاجتماع كانت عن العام المالي (٢٠٢٢) والمعلومة دي مهمة جداً حتى لا يعتبر القارئ الكريم انها للعام (٢٠٢٣) بإعتبار ان سوداتل قدمت خدمات مجانية جليلة اثناء الحرب لا ينكرها احد .
طيب يا عبد اللطيف …..
مجلس الادارة للجمعية العمومية خرج باربعة توصيات (حسب البيان)
ما يهمنا هنا هو التوصية رقم (٣)
و رقم (٤)
(فاااا) ….
أنصحك عزيزي القارى
أمشي أشرب ليك موية وتعال
التوصية رقم (٣) تقول …
يوصي مجلس الادارة بتوزيع ارباح للمساهمين قدرها (٣٣٪) من صافي الارباح والتي تقدر ب (….) و اورد رقم تجاوز ال (١٨) مليون دولار وخرمية الف دولار و كده
طبعاً ….
اول ما يتبادر للذهن انها ارباح بسم الله مشاء الله (٣٣٪) حاجة كبيرة
لكن قبل ما تفرك يديك فرحاً عزيزي المساهم
تابع معاي بقية التوصية …
(قال ليك)
أي بواقع (٠،٠١٤) من الدولار !!
اظنها (١٤) سنتاً
غايتو لو عندك زول في لندن احسن تساله !
يعني دولاري (البخيت ده) يكدح سنته كلها شايل طوريتو واخرتها يجيب لي معاهو (١٤) سنت !
طيب بالله …
لو (دقشت) بيهو سوق (الله اكبر) تفتكروا في يوم احد كان (حا) يجيب معاهو كم دولار !!!!!!
ياخ قول (١٠) سنتات فقط في اليوم
في الشهر كم دولار ؟ ثلاثة دولار اليس كذلك؟
يعني يا ناس (سوداتل) ارباحكم
(اي كلام)
في المقابل ….
تعالوا نقرأ التوصية الرابعة
(قال ليك) …..
يوصي مجلس الادارة للجمعية العمومية (خلي بالك) الخمشة جاياك
بمنح اعضاء مجلس الادارة نسبة (٢,٨٪) من صافي الارباح وقدرها مليون وستمائة الف دولار كمكافآت سنوية
يعني بحسبة بسيطة يا (عب باسط)
كل عضو مجلس إدارة من العشرة سيستلم عداً نقداً (١٦٠) الف دولار !
(إنتا متخيل معاي) …!
طيب نقول الله يرزقهم
ومبروك عليهم
الناس ديل بعملوا شنو مقابل هذا المبلغ؟
هي (اربعة) او (ستة) اجتماعات في السنة علي اعلى تقدير !
يعني في الاجتماع الواحد
الشخص فيهم ….
ماكل
شارب
محلي
و متمبك
وبعد داك (٤٠) الف دولار !
اتخيلوا ….
لو كنت انا معاهم تفتكروا كنت حا اكون في كامل قواي العقلية ؟
صدقوني كنت حا اعلق ليك في اغنية
ود اللمين بتاعت
وداعاً يا ظلام الهم
على ابوابنا ما تعتب
ومرحب يا صباح الحب
تعال ما تبتعد
وقرررررب تعال ما تبتعد
واعلق ليك في (قرررب) دي
عزيزي مساهم (سوداتل) ..
غايتو امش احسبها براك
عشان ما يقولوا الزول ده حرشهم وكده
سهم (سوداتل) افضل
واللا ….
صاج طعمية ؟
فكر براحتك …..
